Sunday, January 15, 2012
မြန်မာနိုင်ငံတွင် အမည်ခံ အရပ်သား အစိုးရသစ် တက်လာပြီးနောက် ၄ လအကြာ ဒုတိယအကြိမ် ပြည်ထောင်စု လွှတ် တော်ကို သြဂုတ်လ ၂၂ ရက်နေ့က ခေါ်ယူကျင်းပခဲ့ပြီး၊ လာမည့် စက်တင်ဘာ ၂၂ ရက်နေ့တွင် တိုင်းဒေသကြီး နှင့် ပြည် နယ် လွှတ်တော်အစည်းအဝေးများ ဆက်လက် ကျင်းပသွားမည် ဖြစ်သည်။ချင်းပြည်နယ်တွင် ပြည်နယ်ဝန်ကြီးချုပ်ဦးဆောင်သည့် ပြည်နယ်အစိုးရ ဖွဲ့စည်းထားသော်လည်း ပြည်နယ်အစိုးရတွင်း မပါ ၀င်သည့် လွှတ်တော်အမတ်များ၏ အနေအထားနှင့် ၎င်းတို့အနေဖြင့် မည်သည့်လုပ်ငန်းများ ဆောင်ရွက်နေသည်ကို ရှင်း ရှင်းလင်းလင်း မသိရသေးပေ။
ယင်းကိစ္စအတွက် ၂၀၁၀ ရွေး ကောက်ပွဲ တွင် ချင်းပြည်နယ်မှ အမတ်(၁၁)ဦး ရွေးကောက်ခံထားရသော ချင်းတိုးတက် ရေးပါတီ (စီပီပီ) ၏ ချင်းပြည်နယ် ဖလမ်း မြို့နယ်အမှတ် (၁) မဲဆန္ဒနယ်မြေမှ ပြည်နယ်လွှတ်တော် ကိုယ်စားလှယ်အဖြစ် ရွေးကောက် တင်မြောက်ခံရသော ဦးနာ့ထန်း ကို ခိုနူမ်းထုန်က ဆက်သွယ်မေးမြန်းထားပါသည်။
မေး ။ ။ မကြာခင်ကျင်းပမယ့် လွှတ်တော်အစည်းအဝေးမှာ ဦးနာ့ထန်းအနေနဲ့ ဘာတွေတင်ပြဖို့ စီစဉ်ထားလဲ?
ဖြေ ။ ။ လွှတ်တော်မှာက တကြိမ်မှာ ကဏ္ဍ ၄ ချက်ထက် ပိုမတင်ပြရဘူးဆိုပြီးတော့ နည်းဥပဒေထဲမှာ ပြဌာန်းထား တယ်။ ဒါကြောင့် ကျနော်တို့ ကြိုက်သလောက်လည်း တင်ပြလို့မရဘူး၊ အဲဒီတော့ ဖလမ်းမြို့နယ်အနေနဲ့က စံချိန်မှီ ဘော်လုံးကွင်း မရှိဘူး၊ ပြီးတော့ ခရိုင်မြို့တမြို့ဖြစ်ပြီးတော့ ယနေ့ထိ ဂေါက်ကွင်းလည်း မရှိသေးဘူးပေါ့လေ၊ အဲလိုဟာမျိူး၊ ပြီးတော့ ရိဒ် – ဖလမ်း-ဝေဘူလ-ကလေး ကားလမ်းက (Maintenance) ပြုပြင်မှုမရှိဘူး ဒါမျိုးတွေ တင်ပြဖို့ရှိပါတယ်။
မေး ။ ။ ပထမအကြိမ် ခေါ်ယူကျင်းပတဲ့ ပြည်နယ်လွှတ်တော် နဲ့ အခု ပြန်ခေါ်မယ့် ဒုတိယအကြိမ် ပြည်နယ်လွှတ်တော်မခေါ်ခင် စပ်ကြားကာလမှာ ပြည်နယ်လွှတ်တော်အမတ်တွေ အနေနဲ့ ဘာလုပ်ငန်းတွေ ဆောင်ရွက်ဖြစ်ပါသလဲ?
ဖြေ ။ ။ ဘာမှလုပ်စရာမရှိပါဘူး၊ ၀န်ကြီးအဖွဲ့တွေကတော့ သူတို့လုပ်စရာတွေတော့ရှိမှာပါ၊ ကျနော်တို့ကတော့ ဘာမှကို လုပ်ကို မလုပ်ရသေးတာ ဘာလုပ်ငန်းမှကို မစရသေးဘူး။
မေး ။ ။ ပထမအခေါက် လွှတ်တော် အစည်းအဝေးကနေ ဦးနာ့ထန်းကို ချင်းပြည်နယ်ရဲ့ ဥပဒေပြုရေးကော်မီတီ ဥက္ကဌ အဖြစ် ခန့်အပ်ထားတယ်နော်၊ အဲဒီ ကော်မီတီ အနေနဲ့ ဘာတွေ ဆောင်ရွက်ဖြစ်ပါသလဲ?
ဖြေ ။ ။ ဘာမှမရှိသေးဘူး၊ အလကားနေရတာပါဘဲ၊ ဥပမာ ဘာနဲ့တူလည်းဆိုတော့ ကျနော်တို့ကို အင်တာဗျူးဖြေတယ် ဖလမ်းမြို့ကနေ နှစ်ယောက်အောင်တယ်၊ ကျနော် နှင့် ကျနော့် သူငယ်ချင်း ဦးနိုးဆွမ်ပေါ့လေ၊ စားပွဲ ကုလားထိုင်တော့ပေး တယ် လစာလည်းပေးတယ်ပေါ့လေ၊ ခဲတံ စာရွက်တွေတော့မပေးဘူး၊ ဘာလုပ်ပါဆိုပြီး ခိုင်းတာလည်းမရှိဘူး၊ လုပ်ပိုင် ခွင့် လည်း ဘာမှမပေးသေးဘူး။
မေး ။ ။ ဦးနာ့ထန်းတို့အနေနဲ့ ရုံးမတက်ရဘူးလား?
ဖြေ ။ ။ ရုံးရယ်လို့ကို လုံးဝမရှိဘူး၊ တခါတလေ ခုလို ဟားခါကိုသွားပြီးတော့ လွှတ်တော်အစည်းအဝေး သွားတက်တာမှ အပ ဘာမှရုံးလည်းမရှိဘူး ဒီလိုဘဲ အလကားနေရတာ။
မေး ။ ။ အစိုးရဘက်ကနေ ရုံးတွေဘာတွေ စီစဉ်ပေးတာ မရှိဘူးလား?
ဖြေ ။ ။ ဘာမှမရှိဘူး၊ ဖြစ်ပုံက ကျနော်တို့က ထွေအုပ်(မြို့နယ်အုပ်ချူပ်ရေးမှူး) ရဲ့ လက်အောက်မှာ နေရမလိုလို ဘာလိုလို ဘယ်သူကမှ ကျနော်တို့ကို ဂရုစိုက်တာမဟုတ်ဘူး။
မေး ။ ။ ပြည်သူလူထုတွေကရော ဦးနာ့ထန်းတို့လို ပြည်နယ်အမတ်တွေကို ဘယ်လိုမြင်လဲ ဘယ်လို ဆက်ဆံကြလဲ?
ဖြေ ။ ။ လူထုတွေက ကျနော်တို့ကို လွှတ်တော်အမတ် ဆိုမှန်းတောင် မသိကြဘူး၊ ကျနော်တို့ ကိုယ်စားလှယ်ဆိုမှန်း တောင်မှ ဂရုကိုမစိုက်ဘူး၊ ဥပမာ ဌာနဆိုင်ရာတခုလက်အောက် ၀န်ထမ်းတယောက်ကို ကျနော်တို့က နည်းနည်းပါးပါး သူတို့ဌာနဆိုင်ရာ လစ်ဟင်းမှုရှိတယ် အဲဒါပြောလိုက်တယ်၊ ကျနော်တို့ကို ဘာမှဂရုစိုက်တာ မဟုတ်ဘူး၊ ကျနော်တို့ကို သူတို့ အရွယ်လောက်များ မှတ်လားမသိဘူး၊ အဲလိုဘဲ ဆက်ဆံတယ် အင်မတန်မှ ၀မ်းနည်းစရာကောင်းတယ်။
မေး ။ ။ အဲဒါတွေက ဘာကြောင့်လဲဗျ?
ဖြေ ။ ။ စနစ်ကိုက သေချာအပြောင်းအလဲ မရှိသေးလို့ဘဲ ထင်တယ်။ ပြီးတော့ လူထုတွေကိုက ကျနော်တို့နိုင်ငံမှာ ပါတီစုံ ဒီမိုကရေစီစနစ် ကျင့်သုံးနေတယ်ဆိုတာ ဘယ်သူမှသဘောမပေါက်ကြဘူး။
မေး ။ ။ ချင်းပြည်နယ်အစိုးရ ဒါမှမဟုတ် ၀န်ကြီးးချုပ်ကရော ဦးနာ့ထန်းတို့လို ပြည်နယ်လွှတ်တော် အမတ်တွေကို အလုပ်ကိစ္စ တိုင်ပင်တာ ဆွေးနွေးတာတို့ မရှိဘူးလား?
ဖြေ ။ ။ ၀န်ကြီးချူပ်က ကျနော်တို့ အမတ်တွေကို တိုင်ပင်တာ မရှိပါဘူး။
မေး ။ ။ ၀န်ကြီးချုပ် ဦးဟုန်းငိုင်းကိုရော ဘယ်လိုမြင်လဲ။ ချင်းပြည်နယ်အတွက် တကယ် အလုပ်လုပ်မယ့်လူ လို့ မြင်လား?
ဖြေ ။ ။ (ပြောဖို့) နည်းနည်း စောသေးတယ်လို့ ထင်တယ်။ ဘာဖြစ်လို့လဲ ဆိုတော့ ခုက လေး ငါး ခြောက်လ လောက်ပဲ ရှိသေးတယ်ဆိုတော့ သူ့အနေနဲ့လည်း ဘာလုပ်လို့ ဘာကိုင်ရမှန်း ကောင်းကောင်း သိဦးမယ်မထင်ဘူး။
မေး ။ ။ ကျန်တဲ့ ချင်းပြည်နယ် ၀န်ကြီးအဖွဲ့တွေကရော ဘာတွေလုပ်နေကြတာလဲ?
ဖြေ ။ ။ နေ့တိုင်းတော့ခရီးထွက်နေကြတာဘဲ၊ လုပ်ကြပါတယ်။ နေ့ရောညပါ ဘာလုပ်မှန်းတော့ ကျနော်တို့ မသိရဘူး။
No comments:
Post a Comment